يلا .... كله علي استاد دمياط يوم الجمعة بعد الصلاة

حقق فريق دمياط انجازا كبيرا في منافسات كاس مصر .. حيث تغلب علي فريق السنبلاوين 2/1 وتاهل الي دور الـ 32

وهذا يعتبر انجازا كبيرا حققه النادي في تاريخ كرة القدم

سيلعب فريق دمياط ان شاء الله يوم الجمعة القادمة 4 ينار في تمام الساعه 1.30 ظهرا مع النادي الاسماعيلي في استاد دمياط

انا عارف طبعا ان المطش مش سهل ابدا وفريق الاسماعيلي فريق قوي وله تاريخه وسمعته

لكن مين عارف ؟؟؟ مش يمكن نعملها ونتاهل لدور الـ16

ادعو الجميع للوقوف بجانب الفريق بعد صلاة الجمعة ان شاء الله

يمكن متابعة وضع الفرق في كاس مصر من خلال هذا الرابط :
http://www.kooora.com/default.aspx?c=3406

كل التوفيق للفريق


تحديــــــــــــث
4/1/2007

خسارة فريق دمياط امام الاسماعيلي

خسر فريق دمياط - بعد مباراة مشرفة -اليوم الجمعة امام فريق الاسماعيلي بهدفين مقابل هدف واحد .. كان فريق الاسماعيلي قد احرز هدفين في بداية الشوط التاني .. وفي نهاية الشوط الثاني استطاع فريق دمياط ان يحرز هدفا وحيدا قبل نهاية الشوط ليتاهل فريق الاسماعيلي وليخرج الفريق للاسف الشديد من مسابقة كاس مصر

مزيد من التفاصيل
هناا

وانباء عن اعتداء جماهير دمياط علي فريق النادي الاسماعيلي .. والجريدة تستنكر ما قامت به مجموعة لا تمثل كل الجماهير وتعتذر لفريق الاسماعيلي ولجماهير الاسماعيليه عما حدث
هناا

دعواتكم لفريق دمياط لكرة القدم



بما ان فريق دمياط لكرة القدم بقاله سنين مظهرش لا في الدوري الممتاز ولا في كاس مصر لدرجة ان الناس معتش فاكرة ان فيه فريق اصلا لدمياط بيلعب كرة قدم ! .. وعشان السبب ده ادعوا الجميع للدعاء لفريق دمياط بالتوفيق في الصفيات الاولي لكاس مصر

حيث اسفرت قرعة مباريات كاس مصر للدور التمهيدي الثالث عن تقابل :

نادي دمياط مع السنبلاوين يوم الاحد 30 /12 علي استاد دمياط
والفائز في هذه المباراة يقابل الاسماعيلي يوم 5 يناير علي استاد الاسماعيلي


كما يلعب فريق الزرقا لكرة القدم مع فريق كهرباء دمياط في نفس الدور
والفائز يقابل النادي المصري يوم 5 يناير علي استاد دمياط


كل التوفيق للفرق التلاتة ودعواتكم يا جماعه معانا لان بصراحه شكل دمياط في كرة القدم بقي وحش قوووي

نصب واحتيال في مدينة دمياط !0

ضبط نصاب استولي علي 900 ألف جنيه من المواطنين بدعوى توظيفها

تمكنت الأجهزة الأمنية بمديرية أمن دمياط من إلقاء القبض على شخص قام بالنصب والإحتيال على 9 مواطنين ، واستولى منهم على 900 ألف جنيه بدعوى توظيفها لهم فى مجال تجارة الألبان مقابل أرباح شهرية.

وكان قسم مكافحة جرائم الأموال العامة بالمديرية قد تلقى بلاغا من المواطن رامى محمد سامى محمود "39 سنة صاحب مكتب استيراد وتصدير" مقيم بدائرة قسم شرطة ثان دمياط ، و8 مواطنين آخرين يفيد بقيام المدعو عصام ج.ا مقيم بدائرة قسم شرطة ثان دمياط بالنصب عليهم والإستيلاء منهم على حوالى 900 ألف جنيه بدعوى تشغليها وتوظيفها لهم فى مجال تجارة الألبان ، وذلك خلال الثلاث سنوات الماضية مقابل أرباح شهرية ، وتوقفه عن إعطاء الأرباح أو رد المبالغ إليهم منذ شهر سبتمبر الماضى.

وعقب تقنين الإجراءات القانونية والتأكد من صدق البلاغ تم ضبط المذكور ، وبمواجهته اعترف بما جاء بأقوال المبلغين ، وتحررت عن ذلك المحاضر اللازمة ، وأخطرت النيابة لمباشرة التحقيقات-حسبما ذكرت وكالة أنباء الشرق الأوسط

الدنيا باظت يا جدعان !0
وحسبنا الله ونعم الوكيل

مقتل سيدة في فارسكور

يكثف رجال المباحث بدمياط جهودهم لكشف غموض مقتل سيدة داخل منزلها بقرية حجاجة بمركز فارسكور .. حيث وجدها زوجها مقتولة بكسر في الجمجمة وتم ابلاغ النيابة التي أمرت بانتداب الطبيب الشرعي لتشريح الجثة لبيان سبب الوفاة


من جريدة اخبار دمياط

صور نادرة لمسجد عمرو بن العاص

الصور اللي هعرضها في هذا الموضوع هي صور لاول مرة تنشر علي موقع او مدونة
الصور هي لمسجد عمرو بن العاص وهو المسجد الشهير والذي يقع في شارع ابو المعاطي ويعتبر من اوائل المساجد التي تم بناؤها علي ارض مصر

الصور اعتقد والعلم عند الله انها التقطت في فترة الاربعينيات او الخمسينيات يعني بالتقريب في الفتره دي

صور للمسجد من الخارج




ومن الداخل
وصو لمنبر المسجد

وفاة سيدة في الزرقا بسبب الغاز
خاص - جريدة دمايطه الالكترونية -

توفت الاسبوع الماضي سيده في مدينة الزرقا بسبب تسرب الغاز من سخان المياه ... كانت السيده وزوجها موجودان بالمنزل وقد حدث تسرب الغاز من السخان مما ادي الي وفاة الزوجة في الحال بينما نقل الزوج الي مستشفى الزرقا في حاله خطيرة
كانت المباحث قد شكت في البداية ان الوفاة ناتجة عن حدوث تسمم غذائي في الطعام مما استدعي حالة من التاهب في قسم الطب الوقائي بالمحافظة ولكن تبين من شهود العيان الذين قاموا بفسخ الشقة انهم لاحظوا وجود رائحة غاز مما ازال الشكوك بحدوث الوفاة نتيجة تسمم غذائي

بدء ازدواج طريق دمياط رأس البر

بدأت المحافظة العمل في ازدواج طريق دمياط رأس البر علي النيل ليصبح هذا الطريق المدخل والمخرج الرئيسي للمصيف.
وأعلن ذلك المحافظ الدكتور فتحي البرادعي خلال جلسة المجلس المحلي للمحافظة .. مشيرا أنه تم البدء في اجراءات نزع الملكية علي الطريق وتعويض أصحاب الاشغالات التي ستزال لتوسيع الطريق وازدواجه.
أوضح ان المحافظة قررت تحمل قيمة التعويضات من مواردها الذاتية مؤكدا أن العمل سينتهي في الطريق قبل موسم الصيف القادم ليحقق نقلة حضارية جديدة لرأس البر لتأمين وسرعة الوصول إليها والخروج منها

نقلا عن الجمهورية

بصراحه انا شايف ان مشروع زي ده مشروع كويس وهيخدم عدد كبير جدا من الناس ومن المصطافين وهيقلل الوقت للانتقال لراس البر ربنا يوفقك المحافظة لهذا المشروع

ومعكم ان شاء الله لمتابعة اي جديد في هذا المشروع

فلووووووووووس بالهبببببببل

الخبر ده قراته في جريدة الجمهورية الحكومية منذ فترة :

اعتمد الدكتور احمد نظيف رئيس الوزراء مبلغ 25 مليون جنيه للبدء في انشاء ميناء للصيد في مدينة عزبة البرج بمحافظة دمياط ... طلب رئيس الوزراء من المهندس محمد منصور وزير النقل تذليل أي عقبات للبدء في تنفيذ المشروع فورا .

ياتي ذلك بعد زيارة رئيس الوزراء احمد نظيف الي دمياط والتي اشاد فيها بالمشروعات التي شهدتها المحافظة بمواردها الذاتية ودون تحميل ميزانية الدولة أي اعباء

واكد محافظ دمياط الدكتور محمد البرادعي ان ميناء الصيد مشروع طموح يتطلع اليه ابناء المحافظة منذ سنوات حيث يعتبر احد المشروعات العمرانية والتنموية المتكلملة ويقع شرق مدينة عزبة البرج التي تمتلك 60 % من اسطول الصيد علي مستوى الجمهورية .. اضاف المحافظ ان الميناء الجديد يتسوعب 1200 سفينة صيد ويضم ارصفة لصناعة سفن الصيد واليخوت وصيانة السفن ومحطة لتموين السفن وثلاجات كبيرة ومصانع للثلج ومستلزمات حفظ وتعبئة الاسماك وملحقا بالميناء وتجمعا سكنيا للعاملين والصياديين .

تعليقي علي الخبر : 0

الخبر انا اعتبره فرقعة اعلامية فقط لا غير .. والكلام ده عشان يتنفذ فعلا - ده اذا كان الخبر اصلا صحيح - محتاج مثلا ربع قرن علي اقل تقدير !!0

وبعدين خلاص يعني المحافظة معتش فيها حاجه تتعمل عشان نروح نعمل قرية للصيادين ؟؟ يعني خلاص رصفوا الشوارع ووصلوا الصرف الصحي للقري والضواحي .. وخاصة ان معظم القرى ليس بها صرف صحي

وبعدين مدام الفلوس كتيرة قوي كده ليه الكثير من المشروعات متوفقة في المحافظة مثل مشروع ردم الترعه الشرقاوية علي طريق الشعراء ومشروع انشاء كوبري عزب النهضة الجديد والذي يربط مدينة دمياط بمركز فارسكور والمشروع متوقف منذ سنوات

رايي ان فيه مشاريع واحتياجات اخرى للمحافظة احق ان احنا ندعمها بالفلوس دي

كنا فين وبقينا فين

صورتان قمت بالتقاطهما من فوق الكوبري العلوي لدمياط من حوالي 4 سنوات تقريبا


ودي صورة من نفس المكان
طبعا اللي يشوف الصورتين ويقارنهم بالصورة اللي فاتت يمكن يفتكر ان الصورة اللي فاتت دي من مكان تاني او من محافظة تانيه غير دمياط !0

لكن سدقوني هي من نفس المكان وعشان كده سميت عنوان الموضوع " كنا فين وبقينا فين " 0

يلا نكمل باقي الصور

دي صورة ايضا من فوق الكوبري العلوي


نسيب بقي الصور اللي من فوق الكوبري ويلا نروح علي منطقة الاعصر

صورة لكتبة مبارك العامة " كان اسمها في الاول مكتبة دمياط العامة " ومطلة علي الكورنيش مباشرة في منطقة الاعصر ايضا

وصورة اخرى للكورنيش من نفس المنطقة

مشروع كورنيش النيل ... من اضخم المشروعات التي تم تنفيذها علي ارض المحافظة
يستحق منا كل شكر وتقدير لمن قاموا بهذا العمل

لكن طبعا هذا لا يمنع ان احنا نرصد اي سلبيات او ننتقد اي سياسات تحدث في هذه المحافظة الجميله

من جديد ... كل الشكر والتقدير لمن قاموا بعمل هذا المشروع الضخم وعلي راسهم محافظ دمياط المهندس محمد البرادعي

ار علني على الدمايطه في المصري اليوم !!00
0
دي صورة لعدد قديم من جريدة المصري اليوم ارسلها لي عبر ايميل الجريدة
damayta@yahoo.com
صديقنا المهندس السعيد اللبان فله كل الشكر والتقدير

المقاله - في تقديري الشخصي - هي بمثابة " أر " و "نق " واضح علي الدمايطه فهي تذكر ان "الدمايطه لا يعرفون معني البطاله "

وان " دمياط مدينة لا تعرف من الدنيا الا العمل " 0

وان الدمياطي " لم يجرب البطالة من قبل " 0


شفتوا بقي اللي بيتقال علينا ؟!0

نفسي بقي كاتب المقال ده ييجي دمياط تاني ويشوف حال الدمايطه ... فالدمايطه لا يختلفون كثيرا عن باقي محافظات مصر في ظروفهم المعيشيه وللاسف اللي بيقرا الكلام ده هيفكر ان الدمايطه دول مليونيرات وان الفلوس في دمياط " ملقحه " علي الارصفة
زي " الرز " !!0
يمكن الكلام ده كان يبقي صح من فترة كبيرة من الزمان فاتت .. لكن الوقتي الكلام ده لا يناسب الواقع اللي بيعيشه شعب دمياط .. والعدد الكبير من الناس اللي قاعدين علي القهاوي خير دليل علي كلامي ده
ولك الله يا شعب دمياط الغلبان


شكرا خاص للمهندس السعيد اللبان

متابعة لمشروع ردم ترعة طريق دمياط-عزبة البرج
- خاص -جريدة دمايطه الالكترونية

يتم حاليا علي طريق دمياط - عزبة البرج والتحديد في منطقة عزبة اللحم امام مركز شرطة دمياط ردم لجزء كبير من الترعه ... والعمل يجري هناك علي قدم وساق حتي يوم الجمعه شغالين
يذكر ان هذا العمل تاخر استكماله لفترة تقترب من 6 اشهر بعد عمل الجزء الاول من المشروع والذي كنت قد غطيت اداثه علي هذا الرابط
http://damayta.blogspot.com/2007/04/blog-post.html

ودي صور المشروع الذي يتم عمله حاليا ... وسيتم ان شاء الله بعد ردم الترعه رصف الطريق بحيث سيصبح الطريق مكونا من حارتين وربطه بالشارع الحربي وبطريق المحور الجديد وبالتالي تسهيل حركة المرور في هذا المكان


المواسير التي تم وضعها منذ وقت طويل يتم الان استخدامها



صورة للمشروع تم التقاطعها من علي طريق المحور



وضع المواسير مكان الترعه ليتم مرور المياه من خلالها ... واحد الاشخاص يتابع المشروع باهتمام



جزء تم استكماله


احد العمال من موقع العمل



جزء سيتم العمل فيه في الايام القادمة ان شاء الله


معكم دائما من قلب الاحداث التي تجري علي ارض المحافظة
تحياتي للجميع

خاص- جريدة دمايطه الالكترونية -

اضراب سائقي خط دمياط - العنانية عن العمل

اضرب اليوم الثلاثاء 6 نوفمبر عدد كبير من سائقي سيارات الميكوباص التي تعمل علي خط دمياط - العنانية عن العمل لاجل غير مسمى
ومطالب السائقين تتلخص في تحسين طريق دمياط العنانيه لان الطريق كما يقولون غير ممهد وطويل وبالتالي هم يشعرون ان الاجرة التي يدفعها الركاب لا تتناسب مع طول الطريق وبالتالي يطالبون ايضا برفع قيمة الاجرة التي يدفعها الركاب
هذا وقد تجمع عدد كبير من الناس عند موقف العنانيه الموجود بجوار قهوة المطري لعل وعسى يستطيعون الركوب والذهاب الي بيوتهم لكل بدون جدوى
وقد لوحظ تواجد عدد من سيارات الشرطه في موقف العنانيه

ولا يزال الاضراب مستمر حتي ساعه اعداد ها التقرير

تابعونا


تحديث >>


انتهاء اضراب السائقين

انتهي في اليوم التاني مباشرة اضراب عدد من سائقي الميكروباصات التي تعمل علي خط دمياط-العنانيه ... وقد جاء فض الاضراب بعد ان قامت المحافظة بالاستجابة لجزء من المطالب وقامت بوضع " اسفلت " جديد في جزء من طريق دمياط العنانيه مما ادي الي عوده السائقين للعمل من جديد

تعليق : اتمني بس ان المحافظه بقي تكمل جميلها وتكمل باقي الطريق يعني ميكونش بيعملوا كده بس عشان السواقين يسكتوا لان مادام اضربوا مرة ع العمل يبقي ممكن يكرروا العمليه دي في اي يوم تاني

A great Screen Saver about Ras El-Barr
اضغط علي الصورة لمشاهدتها بحجمها الاصلي

الاسكرين سيفر دي تم ارسالها الي ايميل الجريدة واللي ارسلها احد القراء الذين احترمهم جدا واحب اشكره علي الهدية الجميلة دي

بجد وانا بتفرج عليها مكنتش مسدق ان دي راس البر !! 0

والله يا جماعه حاجه تفرح قوي وانت بتشوف الصور دي من بلدك

مش هطول عليكوا كتير وياريت اشوف تعليقات الزوار بعد تنزيل الاسكرين سيفر الجميله دي من علي الرابط ده
http://rapidshare.com/files/67502975/Ras_El_Bar.zip.html

ومساحة الملف 2 ميجا بس ... يا بلاش !!0


شكر خاص الي م/السعيد اللبان

حد جامد شكله جاي البلد ؟

يظهر يا جماعه ان فيه حد جامد جاي دمياط النهارده او خلال اليومين دول ... وده بسبب اليافطات الجديده التي تم وضعها علي امتداد كورنيش النيل ... اليافطات فيها حاجات غريبة قوي .. يعني فيها تاييد لرئيس الحزب الحاكم انه يبقي رئيس الحزب في الانتخابات اللي بيقولوا انها هتجري علي رئاسة الحزب الاسبوع الجاي علي الراغم ان مفيش غير مرشح واحد بس !!! .. المهم ان اليافطات فيها مثلا " قرية شرمساح تؤيد مبارك في انتخابات الحزب القادمة " طبعا كلنا عارفين ان قرية شرمساح دي تابعه للزرقا وعلي الحدود مع الدقهليه ومع كده بتؤيد مبارك برده
وهنلاقي يافطه غريبة وهبلة قوي مكتوب عليها " يا برادعي انت اللي نقلت الكوبري " 0
يعني اختصرتوا انجازات الراجل في نقل الكوبري ؟؟؟ سيبوا بقي الكوبري ده في حاله بقي وارحمونا ... حبه الدمايطه هما اللي نقلوا الكوبري وحبه البرادعي هو اللي نقله مش عارف بقي المرة الجايه هيقولوا ايه ؟؟
طبعا فيه صوان كبير موجود الوقتي امام مكتبة مبارك جمب الكوبري عشان البيه اللي هيشرف يجي يقول فيه كلمتين ويروح

تابعوا معنا حصريا اخر اخبار هذه الزيارة



تحديث الاربعاء 21 اكتوبر 2007

بالنسبة للي حصل امبارح وكل الهلمه اللي معموله علي الكورنيش كانت بسبب زيارة المحافظ وزيارة رئيس شركة المقاولون العرب الي مكان الكوبري القديم امام مكتبة مبارك ... يعني كل الفلوس اللي اتعملت بيها اليفط اللي محطوطه كانت عشان المحافظ ورئيس المقاولون ... امال لو مبارك كان جاي دمياط هيعملوا ايه بقي ؟؟
عايز اقول ان الالاف اللي اتصرفت علي اليفط واعمال النفاق اللي ملهاش لازمة ياريت تتصرف احسن في اي حاجه مفيدة تانيه هيكون افضل بكتير قوي

من جديد .. عوده الوش ووجع الدماغ !!0


بعد اسبوعين من الراحه التامة لكل صنايعيه دمياط والمحترفين لكل المهن المتعلقة بالخشب من نجارين ومنجدين واسترجيا واصحاب معارض موبليا ... يعود الان الجميع الي العمل والطحن والنحت في الصخر

لكن مع عوده هذه الفئة من المجتمع ... يعود وجع الدماغ الي فئة اخري من المجتمع وهي الفئة غير العامله في مجال الخشب من موظفيين ومدرسين واطباء وغيره ... وجع الدماغ ده متمثل في حاجه بسيطه قوي وهي ان معظم العاملين - مش كلهم - في مجال الخشب ليس عندهم اي مراعاه لظروف الفئة الاخري - فتلاقيهم عادي جدا انهم يسهروا مثلا للساعه 3 او 4 الفجر ويمكن اكتر من كده وعمال طول الليل يدب بالشاكوش او بقي لو حد ساكن جمب منجد معندوش دم وسهران طول الليل ينجد وطبعا اخونا الموظف مش عارف ينام من الدب اللي عمال يسمعه في دماغه طول الليل وطبعا هيروح الشغل الصبح يكمل نوم علي المكتب !!0

او بقي لو انت ساكن جمب ورشه واقف فيها حبه شباب وجايبين بقي استريو دي في دي في الورشه وطول الليل والنهار شريط عمرو دياب الجديد او شريط مطرب العصر اللي صوته زي الجاموسه بعرور او سعد الصغير وهاتك يا طبله ... شوف بقي هترتاح امتي ولا هتنام امتي

اتمني تكون دي رساله لكل من لا يحترم جاره وانا مش معترض ابدا علي الشغل بالعكس النجارين دول هنلاقي فيهم ناس كتير من اهلها واقربائنا لكن عدم مراعاه شعور الاخرين هو ده اللي بيدايق الواحد قوي في البلد اللي احنا عايشين فيها
.

انقطاع المياة عن دمياط


انقطعت امس الثلاثاء 23 اكتوبر المياه عن معظم مناطق مدينة دمياط .. وكالعادة وبدون سابق انذار انقطعت المياه منذ الصباح الباكر ولم نرى المياه الا في حدود الساعه التاسعة مساء !!0
يذكر ان هذه ليست المرة الاولي التي تنقطع فيها المياة عن هذه المساحه الواسعه من مدينة دمياط وضواحيها وبالتاكيد لن تكون الاخيرة في ظل مواسير المياه التى تهالك معظمها وكل يومين تلاته نسمع ان ماسورة ميه ضربت

احنا معندناش مشكله ان الميه تتقطع وحتي لة لساعات طويله لكن اللي بيدايقنا في الموضوع ده انها تتقطع بدون سابق انذار .. يعني لو فيه صيانه او حاجه في مواسير الميه ليه مفيش عربيات تمشي في كل حته في دمياط تقول ياجماعه الميه هتتقطع او مثلا خبر علي القناة السادسه .. المهم الناس يبقي عندها علم عشان تعمل حسابها

تحول ليل الدمايطة الي نهار

قبل يومين فقط من بداية العيد الصغير ( اللي هو عيد الفطر ) بدات شوارع دمياط تمتلىء بالناس وحتي ساعات متاخرة من الليل
طبعا الكل رايح يشتري .. رايح يشتري ايه محدش يسالني ؟!! اهو اللي بيلاقوه بيشتروه وخلاص .. هدوم لحمة فراخ بطاطس بيض خيار واللي رايح يشتري كحك العيد اللي اسعاره بقت في السما واللي رايح يشتري بجنيه فول عشان يلحق يصحر بيه قبل ما الفجر ياذن

كنت برجع الي البيت في حدود الساعه الثانية مساء كل يوم وكانت بتبدو شوارع دمياط خاليه تقريبا الا الشوارع الرئيسيه زي شارع فكري زاهر اما الوقتي فالوضع اختلف تماما وبقت الناس في الشارع لحد قرب الفجر

طبعا المباركة بتاعت النجارين ( المباركة يعني ان النجاريين ياخدوا اسبوعين اجازة بعد العيد وده عاده معروفه عند كل الحرفيين ) هي اللي زودت اعداد الناس في الشوارع لان خلاص معتش شغل فاللي واخد مراته بيفسحها وبالمره يشتروا حاجه العيد واللي قاعد ع القهوة اهو يشدلوا حجرين وكام عليه سجاير قبل ما الفجر يدن !!0

حبيت بس انقل لكم الصورة صورة البلد قبل ساعات قليلة من صلاة عيد الفطر
وكل سنة وانتوا طيبين

عمال غزل دمياط يعودون الي العمل

بعد قيام اكثر من 300 عامل في شركة دمياط للغزل والنسيج باضراب عن العمل من اجل صرف 4 اشهر اربحا اضافية لجميع العمال وبعد عده وساطات بينهم وبين وزارة القوي العمل .. نجح العمال في الحصول علي حقوقهم ومطالبهم العادله

هذا وقد قام رئيس الشركة يوم الاثنين الماضي باصدار قرار يمنح جميع العاملين بالشركة اجازة ثلاثة ايام واغلاق الشركة خلال هذه الفترة بسبب خوفه من امتداد الاعتصام والاضراب داخل الشركة

هذا وسيتم عقد الجمعية العمومية لشركة الغزل والنسيج بعد عيد الفطر وويتنظر العمال ان تخرج الجمعيه العموميه بنتائج ترضي جميع العمال


تعليق علي الخبر ... محدش يلوم الناس دي تاني لو عملوا كلهم اضراب عن العمل لو الجمعيه العموميه الجايه لم تستجب لمطالبهم

حملات مرورية مكثفة
تشهد شوارع دمياط الرئيسيه خلال هذه الايام حملات مروريه مكثفه خاصه في المساء .. حيث ينتشر عدد كبير من عساكر المرور ومعهم عدد من الظباط في شارع الجلاء وكورنيش النيل وشارع فكري زاهر ويقومون بسحب رخص اي سيارة تقف في الممنوع واحيانا يقومون بسحب السيارة نفسها والتوجه بها الي اداره المرور

تاتي هذه الحملات المكثفه بعد تغيير رئيس المرور السابق العقيد محمد خالد وايضا ياتي بعد الزحام الغير طبيعي الذي تشهده شوارع دمياط فترة الظهيرة وايضا خلال الفترة المسائية حيث يخرج الناس جميعا لشراء مستلزمات شهر رمضان الكريم

استشهاد مجند من كفر سعد اثناء تاديته واجبه

استشهد في الساعه الثانية مساء من فجر يوم السبت الماضي 8 سبتمبر الجندي وائل عبد الهادي والذي ينتمي الي احدى قرى مركز كفر سعد .. كان المجند الذي يقضي فترة تجنيده يقوم هو ونقيب شرطه بنصب احد الكمائن علي طريق الاسماعيليه -السويس وذلك لتامين الطريق من مهربي المخدرات لان هذه المناطق تشتهر بتهريب المخدرات ونقلها عبر المحافظات المختلفه .. حيث تفاجا المجند والضابط اثناء توقيف احدى السيارات باطلاق النار عليهم مما ادى الي استشهاد وائل واصابه نقيب الشرطه في عينه اليمني

تم نقل جثمان الشهيد الي مسقط راسه في كفر سعد حيث شيعت الجنازة اليوم الاحد وحضرها الالاف من اهالي كفر سعد

رحم الله الشهيد رحمة واسعه واسكنه فسيح جناته والهم اهله الصبر والسلوان

وتتقدم الجريدة بالتعازي لاسره الشهيد وندعو له بالرحمة والمغفرة

وانا لله وانا اليه راجعون

الدمايطه : احنا اللي عزمنا الكوبري !!0

الدمايطه : احنا اللي عزمنا الكوبري !!0
صورة لليافطات المتخلفة عقليا اللي انتشرت علي طول الكورنيش خلال الايام اللي فاتت

اكيد طبعا الفكرة دي كانت فكرة واحد معندو عقل اصلا انه يفكر يحط كام يافطة علي طول الكورنيش يقول فيها للناس ان احنا اللي نقلنا الكوبري !! انتوا عايزين الناس اللي مش دمايطه يضحكوا علينا ؟؟ وبعدين ده مكنش حته كوبري لا راح ولا جه عشان نعمل عليه كل الزمبليطه دي

اليافطات اللي اتعلقت لم تعجب ابدا اي حد من دمياط وقوبلت بالسخريه من الجميع واللي حصل الاسبوع اللي فاتت انها بدات تتشال وفعلا الوقتي غير موجوده ده اكيد طبعا بعد ما الساده المسئولين في المحافظه لقوا انها فكره غبيه ومتخلفه وملهاش لازمه وهتضحك الناس علينا وكفايه ان ممكن الناس اللي مش من دمياط يطلعوا نكته علينا ويقولوا ان الدمايطه هما اللي عزموا الكوبري !!0

تغطية خاصة لمشروع نقل الكوبري القديم

من حوالي اسبوع ولما كان البيه احمد نظيف موجود في دمياط تم تحريك الكوبري القديم اللي يبلغ عمره حوالي 120 عاما مسافة قصيرة داخل النيل ليستقر الان بجوار الكوبري العلوي قبل نقله الي مكانه الاخير امام مكتبة مبارك العامة وتحويله الي نادي ثقافي

واترككم مع الصور

صورة للمشروع

ما تبقي من الكوبري القديم وهو الجزء الثابت اللي هيفضل مكانه

الجزء المتحرك من الكوبري تم نقله

مكان الكوبري حاليا داخل النيل



ده المكان اللي هيتنقل ليه الكوبري وتم وضع الاعنده الان داخل النيل

ملخص لزيارة البيه والوفد المرافق له الي دمياط

افتتاح سوق السمك الجديد في شطا
افتتاح قصر ثقافة دمياط بجوار عمر افندي
افتتاح مركز القلب والجهاز الهضمي في الاعصر - اصلا المركز اتفتح بقاله حوالي شهر - !
افتتاح كوبري دمياط المتحرك - طبعا الكوبري الدمايطه كلهم عارفين انه مفتوح بقاله حوالي 8 شهور ! -0
وضع حجر الاساس للفندق اللي ناويين يعملوه في منطفقة اللسان

وكل زيارة والشعب الدمياطي طيب وبخير واتمني اكون وفقت في تغطية ما حدث خلال الايام القادمة

صباح الثلاثاء 14/8 العاشرة صباحا

اخر الاخبار قبل الزياة بساعات

يا جماعه دول بيغسلوا الكورنيش بالميه !! انا هتجنن والله ! يبقى احنا هنا بنرمي الميه عشان ننضف الشارع للبهوات بينما قرى في الدقهليه والبحيرة لا تجد نقطه مياه واحده !!0

تم اغلاق كل الطرق المتفرعة من كورنيش النيل وكل طريق فرعي واقف قدامه عسكري مرور والغربيه ان الكاردون مكتوب عليه " مرور القليوبية " !0 يعني كمان باعتين يجيبوا حواجز من محافظات تانيه .. يلا كله فداك يا باشا يا كبير !!
0
عمال النظافه يملؤون الكورنيش باعداد رهيبة نقدر نقول كل 100 متر واقف عامل نظافه وعمال النظافه دول بصراحه انا اول مرة اشوفهم بالزي الموحد ده وكمان العربيات اللي بيجروها غريبه شويه علي دمياط .. اشك انهم يكونوا باعتين جايبينهم هما كمان من اي محافظة تانيه

اغاني وطنيه شغاله قدام الكوبري المتحرك وامام مكتبه دمياط العامة تحث الشعب الدمياطي علي حب الوطن وعشق ترابه !! عايز اسال هي فاتورة الكهربا بتاعت تشغيل السماعات دي مين اللي هيدفعها ؟؟ 0

امام جمعية الشبان المسلمين واقف حوالي 20 طفل لابسين بدل الكاراتيه وواقفين في عز الحر والشمس في انتظار الوزراء .. طيب لو العيال دي جالها ضربه شمس وماتت هيكون ده مسئوليه مين


تابعوا معنا اخر التطورات لحظه بلحظة

الاثنين 13/8

استمرار تجميل البلد عشان خاطر عيون البيه

نظرا لان احمد بيه نظيف ميقدرش يجي البلد ويشوفها كده علي الطبيعه فكان لازم حبة نفاق حلوين ولازم كبشة فلوس كده تترمي في شويه النفاق دول واهو كله من فلوس الناس
شايفين الكورنيش بعد وضع خطوط المرور بقي عامل ازاي ؟؟

الباشا اللي واقف في وسط الدايرة دي ولابس بني بيقولهم بالحرف الواحد " مش عايز اشوف ورقه مرميه علي الارض " 0

ايضا اعمال التجميل والتشجير امتدت لتشمل كل الطرق اللي سعادته هيمر فيها ومنها الجانب الاخر من كورنيش النيل

وتخيلوا ان طريق العوده من راس البر هيتم غلقه وسيت تحويله الي طريق ذهاب عشان البيه يمر فيه لان طبعا ميقدرش يروح من طريق السنانية عشان ميشوفش منظر الترع الجميله المطله علي جانبي الطريق

ودي المظله اللي امام المكتبه اللي هيقف تحتها البيه لانه طبعا ميقدرش يقف في الشمس بس ربنا يستر وميخرمهاش بسبب الطول المفرط الذي يتمتع به !0

كان نفسي فعلا الحاجات دي نشوفها من المحافظة من غير ما تكون مرتبطه بزيارة الوزراء ونفسي الوزراء يجوا يشوفوا البلد علي الطبيعه

تابعوا معنا اخر الاخبار

مساء الاحد12/8
هما هيضحكوا علي مين بالظبط !0
تم اليوم الاحد وقبل زيارة رئيس الوزراء بيومين اغلاق تام لكوبري دمياط المتحرك امام حركة السيارات وتم انشاء مظله ومنصة عند بدايه الكوبري من ناحيه دمياط سيجلس تحتها الساده الضيوف ليستمعوا لشرح عن انشاء الكوبري المتحرك والمشروع الجديد المتعلق بنقل الكوبري القديم امام المكتبه العامه علي الكورنيش

كما تناقلت الصحف الحكومية ان احمد نظيف سيقوم بافتتاح الكوبري المتحرك !! ناقص كمان يقولوا انه جاي يفتتح كورنيش النيل ومكتبة مبارك ! 0000
فعلا غريبة قوي وشعب دمياط كله عارف ان الكوبري تم افتتاحه منذ شهر ديسمبر اللي فات وكنت كتبت موضوع عن افتتاحه علي هذا الرابط ويمكن التاكد من تاريخ نشر الخبر
http://damayta.blogspot.com/2006/12/blog-post_23.html
فعايز اقول انتوا بتضحكوا علي مين بالظبط ؟!!0

تابعونا


أحمد نظيف هيشرف يوم التلات الجاي
صورة لاحمد نظيف وهو بيقزقز لب جوه البرلمان
المصدر .. العربية نت

قبل التاكد من الخبر من وسائل الاعلام الحكومية كان باين قوي ان فيه حد جامد جاي البلد والدليل علي كده شويه النفاق اللي لازم يتعملوا لاي حد جاي البلد من دهن للارصفه وتجديد للطرق
الكام يوم اللي فاتوا شهد كورنيش النيل عمليات طلاء للاسوار المطله عليه زي سور نادي الشبان المسلمين مثلا وشهد كمان وضع لخطوط مرور جديده علي الطريق وحاليا يقوموا بطلاء الجزء اللي تحت الكوبري الجديد وكمان شايفهم بيصلحوا اللميات المحروقه اللي علي الكورنيش 0

وطبعا اعمال النفاق امتدت لاكثر من ذلك حيث ان كل اللي ليه مصلحه عايز يعملها جابله يافطه حطها في ميدان البوسته بيرحب بيه بالساده الزائرين

احمد بيه نظيف هيشرف هو وباقي الوزرا يوم التلات الجاي 14 اغسطس واللي نفسه اعرفه هما جايين يعملوا ايه في دمياط ؟؟؟ يعني انا مش شايف فيه مشروعات او حاجه تستاهل عشان الناس دي تتعب نفسها التعب ده وتكلف البلد شويه فلوس لزوم النفاق .. مش كانوا يوعدوا في بيوتهم احسن ؟!0

دي صور تثبت النفاق اللي بتقدمه المحافظه للوزرا الللي جايين



كونوا معنا لمتابعة اخر التطورات