حقك يا حضري

للاسف الشديد الموضوع زاد قوي وكبر الكلام فيه على ابن دمياط عصام الحضري .. وكل ده عشان الراجل راح احترف بره ! يعني بدل ما نهنيه ونبقى فرحانيين ان واحد احترف في اوروبا نيجي نهاجمه بالطريقه دي واللي يدايقك اكتر ان ناس كتير بتفسر اللي هو عمله ده وبتقول كلام زي الكلام اللي مكتوب علي احد جروبات الفيس بوك .. شوفوا معايا الكلام واحكموا :0

بعد هروب عصام الحضرى ابن دمياط البار الى منزلش دمياط بعد كاس الامم الفريقيه عشان يشوف اهله زى ما عمل زيدان واحمد حسن واغلب الاعبين
لازم نقول كلنا مصر مش بتحبك يا حضرى

مين اللي قال ان مصر كلها مش بتحب الحضري ؟؟وايه علاقة دمياط بالموضوع ؟؟ وبعدين ما تسيبوا الراجل في حاله بقى .. واحد بقى عنده 35 سنة والاهلي هياخده لحم ويرميه بعد كام سنة عضم مستنيينه لما يترمى عضم ؟؟ وبعدين النادي الاهلي وكل النوادي المصرية بيبقى همها مصلحتها وبس اما بقى ان لعيب يحترف بره عشان ياخد خبرات اكتر ويفيد بيها بلده فده كلام احنا مش بنسمعه غير في الجرايد بس

ده تصويت شارك فيه 22212 شخص علي موقع مصراوي ودي نتيجته

ما رأيك فيما فعله عصام الحضري؟

استغل الفرصة التي لا تتكرر كثيرا 37.4 % اضاع كل ما قدمه لمصر ولناديه 34.6 % الموضوع به تفاصيل غير معلومة 18.2 % وقع ضحية لخدعة 5 % لا اهتم 4.8 %

ده بس رد بسيط على الناس اللي بتطلع تقول مصر كلها مش بتحبه والكلام الفاضي ده ودي ايضا بعض التعليقات اللي نقلتها من على موقع مصراوي علي هذا الرابط هناااا واعتقد ده برده رد كويس علي الناس اللي انتقدت الحضري بالصورة المسيئة اللي حصلت الايام اللي فاتت

بصراحة انا مع الحضري مية في المية ومتنسوش الاهلي بيعمل ايه في اي لاعب يقل عن مسستواه متنسوش وائل جمعة
متنسوش كمان ان الكورة مصالح وكل واحد بيدور على مصلحته فين
والله الحضري عمل الي عليه ولا مرة قصر واتحمل كتير لكن الوقتي الراجل خلاص في نهاية المسيرة من حقه نسمحله بالاحتراف او نحققله امنيته زي ما حققلنا اماني كتيرة واقل حاجة مكناش احنا والاهلي نطلعه بالصورة القذرة ديه كحارس هارب خصوصا من الحوش الي في الادارة

اعتقد اي واحد مكانه كان هيعمل كده والحضري مش حاطط كل اماله في سيون هوا ناوي على الانتقال لنادي كبير ينهي فيه مسيرته

اهلا بيك يا حضري في اي مكان تروحه انت من حقك البطولية من اي نادي يحققلك مستقبلك

يا جماعه كل واحد حر في اللي يعمله والحضري من حقه الاحتراف ويامه لاعيبه كتير احترفو بره ومش بس كد غيروا جنسيتهم ولعبو في بلد تانيه بأسم البلد اشمعنه جت عند الحضري ووقفت علي فكره انتم مكبرين الموضوع علي الفاضي

موقف اتحاد الكوره يدل علي انه حاقد علي كل لاعب محترف والحضرى لو انا مكانه هسافر وبالنسبه للجماهير وانا واحده منهم مع الحضرى وبقول له يشوف مستقبله ويحلم ذي اى انسان مابيحلم

كلنا معاك يا حضري وربنا يوفقك

سمعت اخر اشاعة في البلد
الحق دول هيفجروا السد !!0

من اطرف الاشاعات اللي سمعتها اليومين دول هي شائعة " تفجير سد دمياط " والشائعة فعلا منتشرة في البلد خاصة فيمن يعملون او يسكنون بالقرب من سد دمياط
الشائعة سببها هو كمين المرور المرور منذ فترة تزيد عن الاربعة ايام والموجود عند بداية السد وايضا هناك كمين اخر من الجهة الاخرى للسد عند مدخل راس البر
اما بالنسبة للاشاعة فهي تقول " اعلنت جماعة ارهابية علي الانترنت منذ عدة ايام رغبتها في تفجير سد دمياط " !!0

طبعا انا لما سعت الاشاعة دي من الناس قعدت اضحك لان اولا سد دمياط ده ايه عشان جماعة ارهابية تستهدفه ثانيا فيه ناس هبلة تطلع تقول احنا ناويين نفجر مبنى او سد او اي حاجه قبل ما ينفذوا العملية

حبيت بس انقلكم اخر اخبار البلد واللي بسمعه كل يوم فيها

وسلملي على سد دمياط

البلد غرقت في شبر ميه يا جدعان
!!

ايه اللي بيحصل ده ! ايه اللي انا شايفه ده ! 0
بحور وبحار في كل حته في دمياط

باب الحرس -ميدان البوسته - كورنيش النيل - شارع الجلاء - ميدان الشهابية - عند المحافظة

لو رحت هناك النهارده هتلاقي ميه في كل حته
ده حصل بعد ما الامطار شدت حيلها شويه واستمر هطولها لما يزيد عن يوم كامل

طب تخيل معايا لو الدنيا قعدت تشتي يومين تلاته متواصلة ايه بقي اللي ممكن يحصل في البلد !!
خاصه ان مفيش شبكة لتصريف مياه الامطار زي الدول المحترمة

بس في الاول والاخر هنقول مياه الامطار دي نعمة من عند الله سبحانه وتعالي وفيه دول تانيه مش لاقيه نقطه ميه
ومحدش يعرف قيمه المطر ده اكتر من الفلاحين اللي عندهم اراضي بيزرعوها

يلا الحمد لله علي كل حال

ملحوظة : الصورة اللي في الموضوع دي مش في دمياط لسحن حد يفتكر كده ولا حاجه

بعد فوز مصر بالبطولة
الدمايطه في الشوارع

امتلات شوارع وميادين دمياط بالامس بالالاف من محبي كرة القدم والذين خرجوا فرحا بحصول منتخب مصر علي كاس افريقيا للمرة السادسة في تاريخه
وقد امتلأت الميادين العامة وظهرت فيها اعلام مصر التي رفرفت لساعات طويلة من الليل
واليكم بعض الصور وهي منقولة من جروب
damietta4ever
على الفيس بوك من علي الرابط
http://www.facebook.com/group.php?gid=5467904980

وطبعا احب اهنىء اللاعب الدمياطي عصام الحضرى
ابن كفر البطيخ والذي كان له الدور الكبير في تحقيق كاس البطولة
اتمني ان دي متكونش الفرحة الاخيرة للمصريين والدمايطه واتمني اشوف انجازات تانية لبلدنا في كل المجالات

هل يتأهل فريق دمياط لدوري الاضواء والشهرة ؟
فريق دمياط يكتسح المنصورة علي ارضه بهدفين
خاص - جريدة دمايطه الالكترونية -

استطاع فريق دمياط لكرة القدم التغلب علي فريق المنصورة علي استاد المنصورة يوم امس بهدفين مقابل هدف واحد ضمن مباريات دوري الدرجة الثانية لكرة القدم
وبهذا استطاع فريق دمياط ان يحتل المركز الثاني علي صدارة مجموعته بفارق نقطة واحده فقط عن نادي الالومنيوم واحتل المنصورة المركز الثالث علي المجموعة

يذكر ان فريق دمياط نجح خلال الايام الماضية بضم احد مهاجمي فريق ابو كبير بالشرقية وشراء احد لاعبي فريق كوت ديفوار مقابل مبلغ 30 الف جنيه وذلك لتدعيم فريقه خلال الايام القادمة

كل التوفيق والامنيات الطيبة لفريقنا

عمرها اكثر من 40 سنة
صور نادرة جدا لمصيف رأس البر
هذه الصور حصلت عليها من صديقي العزيز محمد المغربي والذي سمح لي بنقلها الي المدونة فكل الشكر والتقدير له

الصورة الاولي تظهر " طفطف " رأس البر والذي لم يعد موجودا في الوقت الحالي بسبب تعطيله المستمر لحركة المرور

اما الصورة الثانية فتظهر الرئيس جمال عبد الناصر في زيارة الي رأس البر ويظهر في الصف الاخير الرئيس السادات

رايكوا ايه يا جماعة في الصور دي ؟