حلويات العزوني ... في الباي باي

النهارده واول ما صحيت من النوم لقيت اخويا بيقولي في البيت .. الحق دول شالوا العزوني !! 0
العزوني مين يا جماعه اللي شالوه ؟؟؟
المهم وحبه كده ونزلت الشارع وقابلت واحد اعرفه ولقيته بيقولي معرفتش اللي حصل ... دول شالوا العزوني !!!

حسيت ان العزوني ده راجل جامد في البلد وبعد ما استفسرت اكتر عرفت ان محل ومصنع العزوني للحلويات الجرارات شالته وساوته بالارض !!0

رحت شارع الجلاء عشان اتاكد من الموضوع وفعلا لقيت نص المحل طاير ولسه النص التاني هيكمله عليه ولقيت عربيات الامن المركزي واقفه هناك حوالي 4 عربيات او اكتر والعساكر الغلابه جواها ومش عارف لحد الوقتي الامن المركزي رايح هناك يعمل ايه ؟؟؟

المهم .. محل العزوني ده في اول شارع الجلاء علي ايدك الشمال وانت داخل من باب الحرس
موقع مميز جدا ومشار اليه بالدائرة الحمراء - صورة من القمر الصناعي -

والمحل ده واللي سمعته من الناس انه مبني علي ارض الدوله يعني الراجل ده ملوش حاجه في الارض وعشان كده لما طلع من المحل مخدش ولا مليم !!0

لو رحت هناك هتحس ان الدنيا بقت واااسعة وان الشارع فعلا بدا يبقي شارع بجد وبحق وحقيقي

سنوافيكم باي تطورات في هذا الموضوع ان شاء الله