التسول في بلدنا ... وعلاقته بيوم الخميس !!0

تسول .. تسول ... تسول
ده عنوان يوم الخميس عند كتير من الناس
الناس اللي بتيجي دمياط من اخر الدنيا عشان تشتغل شغلانة القرن الواحد والعشرين اللي هي " الشحاته " وبقت شغلانه رائجه واصحابها حضروا دكتوراه فيها !0

كل خميس في دمياط هتلاقي عيل صغير غلس وقفك في الشارع وعايز حاجه عشان يا عيني مكلش ولا لقمه من صباحيه ربنا
او تلاقي ست عندها 60 سنه بتقولك اي حاجه للعيال اليتامى دول !0
او تلاقي شاب داخل عليك وبيقولك ان انا من جمصه وجيت دمياط وممعييش فلوس عشان اروح فياريت تديني اي حاجه عشان اروح بلدنا وسدقني انا محرج منك !0
واشكال من دي كتير

اعرف واحد شحات بيجيلي كل الصيدليه اللي انا شغال فيها عشان اجمدله الفلوس ... والله الواحد مش بيحسد الشحات ده لكن فعلا دي شغلانه بتجيب دهب وياريت الراجل ده بيشحت مرة ولا مرتين ويعمله قرشين يشتغل بيهم لا طبعا ده خلاص بقي محترف مهنة الشحاته

والمشكله ان فيه ناس كتير بتسدق العالم دي وبتطلع فلوس وتديها

لا يا جماعه الموضوع مش كده .. مش اي واحد يجيلك ويقولك اي حاجه لله تديله وبالزات يوم الخميس !!0
لان اظاهر ان العالم دي مش بتنزل تشحت غير يوم الخميس لانهم عارفين ان البلد طول الاسبوع مفلسه ويم الخميس اهو كل واحد بيبقي في جيبه قرشين

فيه فرق يا جماعه بين واحد متسول نصاب نازل يسرقله قرشين من الناس اللي في رايه انهم مش هيعرفوا يكشفوه وبين ناس محتاجه فعلا وسدقوني المحتاج عمره ما هينزل الشارع ويعمل المناظر اللي الناس دي بتعملها

اتمني ان نستطيع جميعا ان نقضي على هذا الوباء المنتشر