اخر اخبار مصنع الموت

تشهد هذه الايام توترا كبيرا بين ابناء دمياط خاصة بعد حلقة برنامج العاشرة مساء والتهديد الذي اطلقه صاحب المصنع للدمايطه وكانه بيقولهم " لو موافقتوش علي المصنع احنا هنفضح مصر في العالم كله " بصراحه الحلقة تابعها الالاف واللي شافها قال للي مشفهاش تاني يوم وبكده تقريبا كل الدمايطه بقى عندهم وعي كامل بالمصنع والخطر اللي هييجي منه في حال اصرت الحكومة علي عدم الاستجابه لضغوط الشارع الدمياطي لايقاف المصنع

احب اشكر بمناسبة حلقة العاشرة مساء الاستاذ محمود صيام ود/مصطفى البردويلي علي مجهودهم في الحلقة وتوصيلهم الرساله لكل الناس بخطورة المصنع وبصراحه حبه وكانوا هيخلوا المسئول المصري عن المصنع يعيط من كتر الاتهامات اللي وجهت اليه
ومن اكثر الحاجات اللي دايقتني في الحلقة هو وجود 5 مصانع اخرى للغاز والبتروكيماويات في منطقة ميناء دمياط وتم انشاءها في فترة من الزمن كانوا الدمايطه لسه ميعرفوش حاجه ودي مثلا صورة لمصنع سي جاز من على بعد وشوف الهباب اللي طالع منه واعتقد ان فيه ناس كتير شافوا المنظر ده قبل كده
فبصراحه يعني يا وزير البيئة احنا اللي فينا مكفينا ومش ناقصين يجيلنا مصنع كمان قدرته الانتاجية ضخمة جدا لو قارناها مثلا بمصنع سماد طلخا اللي كلنا بنشوفه واحنا رايحين المنصورة يعني مش ناقصين ومش عايزين نشوف منظر زي اللي في الصورة دي في دمياط

او مثلا زي دي

وتتحول مدينة دمياط الجميلة الي مدينة اشباح


يوم الخميس اللي فات تم تنظيم وقفة احتجاجية امام مبني المحافظة تضم اكثر من 1000 شخص دعت اليها نقابة المحاميين في دمياط للاحتجاج علي اقامة مصنع الموت ودعا ناصر العمري المحامي المعروف الى مظاهرة شعبية ظهر يوم الاتنين القادم ومؤتمر حاشد بمقر النقابة في راس البر في الساعة الثامنة مساء
الصورة من المصري اليوم

نشرت المصري اليوم خبرا تفيد فيه ان الحكومة تعتزم نقل المصنع الي السويس او العين السخنة ولا اعلم ما مدى صحة الخبر واحنا كل اللي يهمنا تنفيذ علي ارض الواقع مش عايزين وعود ولا قرارات لا تنفذ ولا تطبق .. الخبر اللي عايز يقراه علي هذا الرابط هنااااا

حزب التجمع في يوم شم النسيم يستعد لتنظيم وقفة احتجاجية ينظمها الاطفال عند مدخل راس البر حاملين شارات سوداء تحت شعار " تعاطفا مع راس البر "

زادت الدعوات للحكومة المحترمة من الكثيرين من ابناء دمياط بشراء ارض المصنع باي ثمن تحدده الحكومة وتعويض الشركه الخسائر المادية وهذه النقطة اثارها محمود صيام عضو مجلس الشعب في برنامج العاشرة مساء وبصراحه دي فكرة كويسه جدا عشان الحكومة ميبقاش عندها حجة وهتحطهم امام الامر الواقع

ملاحظة : المصنع حتي يوم الجمعة 18 /4 الساعة 11 ظهرا كان العمل في المصنع جاري ومستمر وانا كنت في منطقة المصنع وشفت الشغل في المكان يعني اللي يقولك المصنع وقفوا الشغل فيه ارد عليه ببساطه واقوله روح شوف بعينيك


تابعوا معنا كل جديد بخصوص المصنع اولا باول