احذروا شحاتين العيد !


تستقبل محافظة دمياط في العشر الاواخر من رمضان كل عام المئات من " الشحاتين " الذين يقدمون الي المحافظة للـ " شحاتة " والتسول والنصب علي الناس وطبعا الناس دي وللاسف الشديد بتعرف تضحك علي كتير من الدمايطه وعلي فكرة الناس دول مش من دمياط وبييجوا المحافظة بس عشان الغرض ده واللي عايز يشوف مناظر من دي يروح مثلا شارع الجلاء وهيلاقي اللي جاي يقوله " كل سنة وانت طيب يا حج " واللي جايه تقولك " حاجه لله يا ابني وربنا يسعدك " وحاجات من دي كتير

يا جماعة نفسي اعرف ليه احنا بنديهم فلوس
وليه عودناهم علي كده
معقول معتش عندنا عقل خالص نفرق بين المحتاج فعلا وبين المتسول
وهل المحتاج فعلا هتنزل ويذل نفسه للناس بالطريقة اللي الناس دي بتعملها

جاتلي واحده من كام يوم بتقولي انا كل عيد باجي هنا الصيدليه اخد العيديه بتاعتي من الدكتور صاحب الصيدليه .. قولتلها " ربنا يسهلك يا حاجة " قالتلي معلش يا ابني اي حاجه كده انا كل سنة باجي هنا والدكتور صاحب الصيدليه بيديني متكسفنيش .. قلت يمكن يكون صاحب الصيدليه بيديها وتكون فعلا محتاجة .. طلعت جنيه وادتهولها تعرفوا عملت ايه .. رمت الجنيه وقالتلي ايه ده جنيه !! انا عايزه خمسه جنيه !!! طب واحده زي دي بالله عليكوا محتاجة الصدقة !0

رحمتك يا رب

مين الراجل ده ؟؟؟

انتشرت في الايام الماضية صور في الميادين العامة والشوارع الرئيسية في دمياط مثل ميدان البوستة والشهابية وشارع الجلاء هذه الصورة وهي تحمل تحذير للناس بعنوان " احذر اخي المسلم " حيث تحذر من شخص يدعى السعيد ابراهيم ويقول التحذير انه نصب واحتال مبلغ 517 مليون جنيه

والسؤال الذي تبادر الي ذهني لما شفت الصورة دي .. مين اللي طبع التحذير ده وطبعه ولزقه في الميادين الرئيسية ؟ خاصة وان التحذير لا يحمل اي صفة حكومية رسمية ويا ترى تحذير زي ده ممكن يجيب نتيجة ويتم القبض علي هذا الرجل ؟ واما السؤال الاكبر عندي هو كيف قام باحتيال نص مليار جنيه والناس مش لاقيه تاكل ؟!0
ربنا علي الظالم والمفتري

ورد النيل يحتل دمياط !0

يشهد فرع النيل في دمياط هذه الايام هجوما كاسحا لورد النيل واصبح ملاحظا جدا ان المياه تحولت الي اللون الاخضر وذلك مع بداية فتح سد دمياط وطبعا سيستمر رورد النيل في التحرك الي ان يصل الي منطقة اللسان وبصراحة هذه هي الامرة الاولى في حياتي التي اشاهد فيها ورد النيل بهذه الكميات المهولة تغزو نهر النيل


بجوار كوبري دمياط المتحرك
امام ميدان البوستة

من فوق الكوبري العلوي ناحية السنانية

ورد النيل بطول كورنيش النيل



ويعد ورد النيل من النباتات التي يكثر مشاكلها خاصة وانها تستهلك كميات كبيرة من المياه الصالحة للزراعة كما انها تستهلك كميات كبيرة من الاكسجين الذائب في الماء وبالتالي يهدد حياة الاسماك كما انه يؤدي الي انسداد القنوات والترع الصغيرة
والسؤال هنا .. كيف سيتم التخلص من هذه الكميات الكبيرة من ورد النيل قبل ان تظهر مشاكلها ؟؟ ننتظر الاجابة !0

علمني أجريوم !!0

اولا السلام عليكم ورحمة الله وبركاته وكل عام والدمايطه كلهم بخير
لازم اكرر اعتذراي واسفي لتوقف الجريدة لفترة زادت عن شهر لظروف خاصة واعدكم ان شاء الله بالاستمرار في الفترة القادمة

الفترة اللي فاتت بخصوص اجريوم شهدت خطوة كبيرة وهي ايقاف العنمل نهائيا في المكان الحالي لاجريوم ونقله الي داخل الميناء تحت اسم " موبكو " وهي الشركة الموجوده حاليا في الميناء وبالتالي اللي حصل من الحكومة هو تغيير اسم اجريوم الي موبكو ونقله فقط مئات الامتار الي داخل الميناء والعمل علي زيادرة مساحة موبكو وتطويره

العلامة الزرقا اللي في الصورة الجاية هو مكان اجريوم والعلامة الحمرا هو مكان موبكو

ده مكان موبكو داخل الميناء واللي عايز يوصل لمكان موبكو ياخد طريق راس البر دمياط الجديدة هيلاقي المصنع علي يمينه اول ما يبدا الطريق اللي جمب سور المينا

طبعا القرار اللي الحكومة المحترمة طلعته زي كبسولة المسكن عشان بس الدمايطه يسكتوا بقى لانهم مش عاوزين وجع دماغ كتير !! لانهم بكده هيبقى عندهم المبرر انهم يقولوا ان المصنع الوقتي موجود خارج جزيرة راس البر وانه موجود داخل منطقة صناعية في الميناء لكن الدمايطه مش هيسكتوا لحد ما يلاقوا اولادهم بيموتوا ادامهم والمصانع كل يوم بتزيد في بلدهم وسياحتهم ومصادر دخلهم بتضييع وهما واقفين يتفرجوا
البوستر الشهير الذي تم تصميمه من شباب دمياط ضد اجريوم

علمني اجريوم ان الحكومة بتاعتنا اخر حاجه بتفكر فيها هي الشعب المصري
علمني اجريوم واثبت لي الفساد المنتشر في الوزارات المصرية والمليارات التي تدفع كرشاوى للوزراء والمسئوليين
علمني اجريوم ايجابية شعب دمياط ووقوفه وقفة رجل واحد امام الفساد
علمني اجريوم الاسلوب الحضاري للدمايطه في التعبيير عن رايهم
علمني اجريوم كيف يقف بعض اعضاء مجلس الشعب عن دمياط ضد ابناء بلدهم
علمني اجريوم كيف تحافظ دول الغرب علي مواطنيها وتنقل ملوثاتها الي دول العالم الثالث فالمواطتن فيها لا يساوي تعريفه
علمني اجريوم انه " ما ضاع حق وراءه مطالب " وان اسلوب الضغط علي الحكومة هو الاسلوب الوحيد لانتزاع الحقوق

كلمة اخيرة .. ستبقى قضية اجريوم وموبكو هي شغل الدمايطه الشاغل ومهما طال الزمن سيحقق الدمايطه هدفهم في تطهيير ارضهم

تحياتي